வவுனியாவில் அனுமதியற்ற வியாபார நிலையத்தால் அதிருப்தி!

வவுனியா கோறவப்பொத்தானை வீதியில், நகரசபையின் அனுமதியற்ற வகையில் அமைக்கப்பட்டுள்ள வியாபார நிலையம் மக்கள் மத்தியில் தவறான ஒரு அபிப்பிராயத்தை ஏற்படுத்தியுள்ளதாக சபை உறுப்பினர் சந்திரகுலசிங்கம் மோகன் குற்றம் சுமத்தியுள்ளார்.

வவுனியா நகரசபையின் இந்த வருடத்திற்கான இறுதி அமர்வு தவிசாளர் இ.கௌதமன் தலைமையில் இன்று (வியாழக்கிழமை) இடம்பெற்றது.

இதன்போது பேசிய குறித்த உறுப்பினர், “அனுமதியற்ற வியாபார நிலையம் தொடர்பாக இதுவரை எந்த நடவடிக்கையும் எடுக்கப்படவில்லை. குறித்த வியாபார நிலையத்திற்கு வழக்கு தாக்கல் செய்யகோரி நீண்டகாலமாகியும் அது நடைமுறைக்கு வரவில்லை.

மூன்று வருடங்களாக சபையில் இந்த விடயத்தை கதைத்துகொண்டிருக்கின்றோம். விரைவாக  நடவடிக்கை எடுக்கப்படவேண்டும். ஏனெனில் அந்த வியாபார நிலையத்தை சார்ந்தவர் சபையில் உள்ள பலருக்கு 50 இலட்சத்திற்கும் மேல் பணம் வழங்கியுள்ளதாக தெரிவிக்கின்றார்.

எனவே இதனை இப்படியே விட்டுவிடமுடியாது. உரிய நடவடிக்கை எடுக்கப்படவேண்டும். அடுத்த சபை அமர்விற்குள் இதற்கான சட்ட நடவடிக்கை எடுக்கப்படவேண்டும். உண்மை கண்டறியப்படவேண்டும்.

அத்துடன் தர்மலிங்கம் வீதியின் முகப்பில், நகர மத்தியிலுள்ள பாதணி விற்பனை நிலையமானது தகரங்கள், ஓலைகளால் அடைக்கப்பட்டு நடாத்தப்பட்டு வருகின்றது. குறித்த கடையும் அகற்றப்படவேண்டும்.

அத்துடன் சபைக்குட்பட்ட பகுதிகளில் மீன்கடைகளை பலர் நடாத்தி வருவதால் சபைக்கு சொந்தமான மீன் கடைகள் எவையும் ஏலத்தில் எடுக்கப்படவில்லை. இதனால் சபையின் பல இலட்சம் ரூபாய் வருமானம் பாதிக்கப்பட்டுள்ளது. இங்கு தனிநபரே அதிக வருமானத்தை ஈட்டுகிறார். அதனை சபை ஈட்டினால் அது மக்களுக்கே பயன்படும். எனவே மீன் சந்தைகளை தவிர வேறு இடங்களில் வைத்து மீன் விற்பதற்கு தடை விதிக்கவேண்டும்.

இந்த பிரச்சினைகள் இங்கு கதைக்கப்பட்டாலும் எவையும் விரைவாக நடைமுறைப்படுத்தப்படவில்லை. சபையில் கதைப்பதால் அர்த்தமில்லாத நிலையே காணப்படுகின்றது” என்றார்.

குறித்த விடயங்கள் அனைத்தும் சபையால் ஏகமனதாக தீர்மானமாக எடுக்கப்பட்டது.

Tamilarul.net   #Tamil   #News   #Tamil News   #Tamil Daily News   #Website   #Tamil News Paper   #Tamil Nadu Newspaper  #Online   #Breaking   News Headlines    #Latest Tamil News   #India News    #World News   #Tamil Film   #Jaffna   #Kilinochchi  #Mannar  #Mullathivu  #Batticola  #Kandy  #Srilanka  #Colombo