ஓடிஓடி வாழ்ந்தபோதும் ஓய்ந்திடாத கல்வி.❗

குண்டு மழை நடுவிலும்

கொள்கையோடு கற்றோம் - உலகம்

கண்டு கொள்ளா நிலையிலும்

கல்வியினைப் பெற்றோம்.

மண்டை பிளக்கும் வெயிலிலும்

மரநிழலில் கற்றோம் - கொடும்

சண்டை நடந்த நேரத்திலும்

சலிக்காமல் கற்றோம்.

பராலைற் வெளிச்சத்திலும்

படிப்பினைத் தொடர்ந்தோம் - வளம்

இராத காலங்களிலும்

வல்லோராய் வந்தோம்.

உயிர்காத்து கற்பித்தோர்க்கு

உயர் மதிப்பைக் கொடுத்தோம் - அன்று

உயிர் துறக்கும் வாழ்வினிலும்

உயர்

மதிப்பெண்கள் எடுத்தோம்.

தந்தை தாயின் உதவியின்றித்

தனியாகச் சென்றோம் - நல்ல

சிந்தையுள்ள குருமாரைச்

சந்தித்ததால் வென்றோம்.

அண்டை நாட்டின் சதியினாலும்

அழுதழுது கற்றோம் - என்றும்

அன்றையநாள் கல்வி வாழ்வை

எப்படித் தான் மறப்போம்

-பிறேமா(எழில்)-