இந்திய ராணுவ குழு கிளிநொச்சியில்!📸

கிளிநொச்சி மற்றும் வடக்கு மாகாணத்தை தாக்கிய அண்மைய வெள்ள அனர்த்தத்தால் சேதமடைந்த முக்கிய பொதுத்தளவாடங்களை மீளமைக்கும் பணிகள் விரைவாக முன்னெடுக்கப்பட்டு வருகின்றன. இந்தப் பணிகளின் ஒரு பகுதியாக இலங்கை வந்துள்ள இந்திய இராணுவ பொறியியல் பிரிவினர், சேதமடைந்த பாலங்கள் மற்றும் அணைபணிமனைகளின் புனரமைப்பை பல்வேறு இடங்களில் ஆரம்பித்துள்ளனர்.

அத்தகைய பணிகளின் தொடர்ச்சியாக, பரந்தன் – முல்லைத்தீவு A-35 வீதியின் 11ஆம் கிலோமீற்றரில் வெள்ளத்தால் கடுமையாக சேதமடைந்த பாலத்தை புனரமைக்கும் நடவடிக்கைகள் முன்னெடுக்கப்படுகின்றன. இதற்கான ஒருங்கிணைப்பை முன்னிட்டு, மாவட்ட அரசாங்க அதிபர் மற்றும் சம்பந்தப்பட்ட அதிகாரிகளுடன் இந்திய ராணுவ பொறியியலாளர் குழு விரிவான கலந்துரையாடலில் ஈடுபட்டது.

இன்று பிற்பகல் கிளிநொச்சி மாவட்டத்திற்கு வருகை தந்த இந்திய ராணுவ பொறியியல் குழுவை மேஜர் ANGAD SING GURM தலைமையேற்றிருந்தார். அவர்கள் சேதமடைந்த பாலப்பகுதியை பார்வையிட்டு, தொழில்நுட்ப மதிப்பீடு செய்ததுடன், புனரமைப்பு பணிகளுக்கான ஆரம்ப கட்ட நடவடிக்கைகளையும் அதிகாரப்பூர்வமாக தொடங்கியுள்ளனர்.

இந்திய ராணுவ பொறியியலாளர்களின் துரிதமான ஒத்துழைப்பினால், வடக்கிலுள்ள மக்கள் பயன்படுத்தி வந்த முக்கியப் போக்குவரத்து பாதையின் இயல்பான செயல்பாடு விரைவில் மீளமைக்கப்படும் என எதிர்பார்க்கப்படுகிறது.