வட கொரியாவின் புதிய போர்க்கப்பலில் ஏவுகணை சோதனை:!

அதிபர் கிம் ஜோங் உன் நேரில் ஆய்வு!

மத்திய கிழக்கில் ஈரான் மற்றும் அமெரிக்காவிற்கு இடையே போர் பதற்றம் உச்சமடைந்துள்ள நிலையில், உலக நாடுகளின் கவனத்தைத் தனது பக்கம் ஈர்க்கும் வகையில் வட கொரியா புதிய போர்க்கப்பல் ஒன்றிலிருந்து அதிநவீன ஏவுகணைச் சோதனையை முன்னெடுத்துள்ளது.

வட கொரியாவின் கடற்படையைப் பலப்படுத்தும் நோக்கில் புதிதாகக் கட்டமைக்கப்பட்டுள்ள 5,000 தொன் எடையுள்ள 'சோ ஹியோன்' (Choe Hyon) எனும் நாசகாரி போர்க்கப்பலில் (Naval Destroyer) இருந்து முன்னெடுக்கப்பட்ட இந்த 'மூலோபாய' (Strategic Cruise Missiles) ஏவுகணைச் சோதனையை அதிபர் கிம் ஜோங் உன் நேரில் பார்வையிட்டதாக அந்நாட்டு அரச ஊடகமான KCNA செய்தி வெளியிட்டுள்ளது.

கடற்படையின் அணுவாயுதப் புரட்சி

இந்தச் சோதனையின் போது உரையாற்றிய கிம் ஜோங் உன், "நமது கடற்படையை அணுவாயுத மயமாக்கும் திட்டம் திருப்திகரமான முன்னேற்றத்தை எட்டியுள்ளது. கடலுக்கு அடியிலும், மேலேயும் இருந்து எதிரிகளைத் தாக்கும் வல்லமை வட கொரியாவிற்கு வேகமாக அதிகரித்து வருகின்றது" எனத் தெரிவித்தார். மேலும், அரை நூற்றாண்டு காலத்திற்குப் பின்னர் நாட்டின் கடல்சார் இறையாண்மையைப் பாதுகாப்பதில் ஏற்பட்டுள்ள பாரிய மைல்கல் என இந்தப் புதிய போர்க்கப்பலை அவர் வர்ணித்துள்ளார்.

பொதுவாக வட கொரியா தனது ஆயுதங்களை 'மூலோபாய' (Strategic) ஆயுதங்கள் எனக் குறிப்பிடுவது, அவை அணுவாயுதங்களை ஏந்திச் செல்லும் திறன் கொண்டவை என்பதைக் குறிப்பதாகத் தென்கொரியாவின் 'யோன்ஹாப்' செய்தி நிறுவனம் சுட்டிக்காட்டியுள்ளது.

முன்னைய பின்னடைவுகளும் தற்போதைய நகர்வும்

வட கொரியாவின் இந்த அதிரடி நகர்வு, கடந்த காலங்களில் கடற்படை நவீனமயமாக்கல் திட்டத்தில் ஏற்பட்ட பின்னடைவுகளை மறைப்பதற்கான ஒரு முயற்சியாகவும் பார்க்கப்படுகின்றது. குறிப்பாக, கடந்த 2025 ஆம் ஆண்டு மே மாதம், இதே போன்றதொரு போர்க்கப்பலைக் கடலில் இறக்கும் போது ஏற்பட்ட விபத்தினால் கப்பல் கவிழ்ந்து பெரும் சேதம் ஏற்பட்டது. அந்தச் சம்பவத்தைக் கடும் 'குற்றச்செயல்' என விமர்சித்திருந்த கிம் ஜோங் உன், தற்போது புதிய கப்பலில் வெற்றிகரமாக ஏவுகணைச் சோதனையை நடத்தி தனது இராணுவ பலத்தை மீண்டும் நிலைநாட்டியுள்ளார்.

இராஜதந்திர ரீதியிலான காலநேரம்

சர்வதேச சமூகம் ஈரானியப் போர் நெருக்கடிகள் குறித்துக் கவலை கொண்டுள்ள ஒரு காலகட்டத்தில், வட கொரியா இவ்வாறான சோதனைகளை முன்னெடுப்பது தற்செயலானது அல்ல என அரசியல் அவதானிகள் கருதுகின்றனர். அமெரிக்கா மற்றும் அதன் நட்பு நாடுகள் ஈரானிய விவகாரத்தில் கவனம் செலுத்தும் வேளையில், தம்மீதான சர்வதேச அழுத்தங்களைக் குறைப்பதற்கும், தனது இருப்பைப் பலமாகப் பதிவு செய்வதற்கும் கிம் ஜோங் உன் இந்தச் சந்தர்ப்பத்தைப் பயன்படுத்திக் கொண்டுள்ளார்.

நாட்டின் பொருளாதார நிலையை மேம்படுத்துவதாகக் கடந்த வாரம் கட்சி மாநாட்டில் உறுதியளித்திருந்த போதிலும், உணவு மற்றும் அத்தியாவசியத் தேவைகளை விட இராணுவ நவீனமயமாக்கலுக்கே வட கொரியா இப்போதும் முன்னுரிமை அளித்து வருகின்றமை இந்தச் சோதனையின் மூலம் மீண்டும் உறுதிப்படுத்தப்பட்டுள்ளது.