16 வயதிற்குட்பட்ட சிறுவர்கள் சமூக ஊடகங்களைப் பயன்படுத்துவதற்கு முழுமையான தடை

 

டிஜிட்டல் உலகம் இன்று நம் குழந்தைகளின் விரல் நுனியில் சுருங்கிவிட்ட காலக்கட்டத்தில், ஒட்டுமொத்த உலகையும் உற்றுநோக்க வைக்கும் அதிரடி முடிவு ஒன்றை பிரிட்டிஷ் அரசு எடுத்துள்ளது. 

16 வயதிற்குட்பட்ட சிறுவர்கள் சமூக ஊடகங்களைப் பயன்படுத்துவதற்கு முழுமையான தடை விதிக்கப்படும் என்று பிரிட்டன் பிரதமர் Keir Starmer அதிகாரப்பூர்வமாக அறிவித்துள்ளார்.

"சமூக ஊடகங்கள் நம் குழந்தைகளை மகிழ்ச்சியற்றவர்களாகவும், பாதுகாப்பற்றவர்களாகவும் மாற்றுகின்றன. ஒரு பிரதமராக மட்டுமன்றி, ஒரு தந்தையாகவும் இதை என்னால் இனிமேலும் அனுமதிக்க முடியாது."

— கீர் ஸ்டார்மர், பிரிட்டன் பிரதமர்.

இந்த புதிய சட்டத்தின் கீழ், உலகளவில் மிகவும் பிரபலமான முன்னணி சமூக ஊடகப் பக்கங்கள் முடக்கப்படவுள்ளன.

தடைக்காலத்திற்குள் வரும் செயலிகள்: TikTok, Instagram, Facebook, YouTube, Snapchat மற்றும் X ( Twitter).

 விலக்கு அளிக்கப்படுபவை: வாட்ஸ்அப் (WhatsApp) மற்றும் சிக்னல் (Signal) போன்ற தனிநபர் செய்திப் பரிமாற்றச் செயலிகளுக்கு (Messaging Services) இந்தத் தடையிலிருந்து விலக்கு அளிக்கப்பட்டுள்ளது.

வெறும் கணக்குகளை முடக்குவதுடன் இந்தச் சட்டம் நின்றுவிடவில்லை. சிறுவர்களுக்கான Livestreaming அம்சங்களைத் தடுப்பது மற்றும் அறிமுகமில்லாத அந்நிய நபர்கள் சிறுவர்களைத் தொடர்புகொள்வதைத் தடுக்கும் தொழில்நுட்பக் கட்டுப்பாடுகளும் இதில் சேர்க்கப்பட்டுள்ளன.

இந்த அதிரடித் திட்டம் வெறும் பேச்சோடு நின்றுவிடாமல், மிக வேகமாகக் களம் இறக்கப்படவுள்ளது.

இந்த ஆண்டு கிறிஸ்துமஸ் பண்டிகைக்கு முன்பாகவே இதற்கான புதிய விதிமுறைகள் பிரிட்டன் நாடாளுமன்றத்தில் சமர்ப்பிக்கப்படும்.

வரும் அடுத்த ஆண்டு (2027) வசந்த காலத்தில் (Spring) இந்தச் சட்டம் நாடு முழுவதும் அதிகாரப்பூர்வமாக நடைமுறைக்கு வரும் என அரசு தெரிவித்துள்ளது.

இந்த முடிவானது திடீரென எடுக்கப்பட்ட ஒன்று அல்ல. பிரிட்டன் அரசு சுமார் 1,16,000 பேரிடம் நடத்திய தேசிய அளவிலான விரிவான ஆலோசனைக்குப் பிறகே இந்த முடிவை எடுத்துள்ளது.

சமூக ஊடகங்களை தடை செய்வது அவ்வளவு எளிதான காரியம் அல்ல என்பதைப் பிரதமர் ஸ்டார்மர் நன்கு அறிவார். 

மெட்டா, கூகுள், எக்ஸ் போன்ற உலகின் மிக சக்திவாய்ந்த தொழில்நுட்ப நிறுவனங்களின் எதிர்ப்பை அவர் எதிர்கொள்ள வேண்டியிருக்கும்.

இதுகுறித்து பேசிய அவர், "நாங்கள் உலகின் மிகப்பெரிய நிறுவனங்களை எதிர்த்துப் போட்டியிடப் போகிறோம், அதில் வெற்றியும் பெறுவோம்" எனத் தீர்க்கமாக எச்சரித்துள்ளார்.

ஏற்கனவே ஆஸ்திரேலியா இதுபோன்ற ஒரு தடையைக் கொண்டுவர முயற்சித்தது. ஆனால், தொழில்நுட்ப ரீதியாக அதைச் செயல்படுத்துவது கடினமாக இருந்தது. 

ஆஸ்திரேலிய ஒழுங்குமுறை அமைப்பின்படி, தடை விதிக்கப்பட்ட பிறகும் 10-ல் 7 பெற்றோர்கள் தங்கள் குழந்தைகள் இன்னும் அந்தச் செயலிகளைப் பயன்படுத்தி வருவதாகக் குறிப்பிட்டுள்ளனர்.

எனவே, ஆஸ்திரேலியாவின் தவறுகளிலிருந்து பாடம் கற்றுக் கொண்டு, பிரிட்டன் இந்தத் தடையை எவ்வாறு பலத்த தொழில்நுட்பக் கட்டுப்பாடுகளுடன் அமல்படுத்தப் போகிறது என்பதைப் பொறுத்திருந்துதான் பார்க்க வேண்டும்.

குழந்தைகளின் மனநலன் மற்றும் பாதுகாப்பிற்கு முன்னுரிமை கொடுத்து பிரிட்டன் எடுத்துள்ள இந்தத் துணிச்சலான முடிவு, டிஜிட்டல் உலகில் ஒரு புதிய புரட்சியை ஏற்படுத்தும் என எதிர்பார்க்கப்படுகிறது. 

இது மற்ற நாடுகளுக்கும் ஒரு முன்மாதிரியாக அமையுமா என்பதைப் பொறுத்திருந்து பார்ப்போம்!