ஞானசார தேரருக்கு மன்னிப்பு - காரணம் வெளியானது!!

 

கலகொடஅத்தே ஞானசார தேரருக்கு 2019ஆம் ஆண்டு ஜனாதிபதி மன்னிப்பு வழங்கப்பட்ட முடிவை முன்னாள் ஜனாதிபதி ரணில் விக்ரமசிங்க நியாயப்படுத்தியுள்ளார்.

சிறைத்தண்டனை அனுபவித்துக்கொண்டிருந்த பௌத்த தேரரின் காவியுடையை அகற்றுவதால் ஏற்படக்கூடிய மத ரீதியான விளைவுகள் தொடர்பில் கலந்துரையாடப்பட்ட பின்னரே இந்த முடிவு எடுக்கப்பட்டதாக அவர் தெரிவித்துள்ளார்.

கொழும்பு பிளவர் வீதியில் அமைந்துள்ள ஐக்கிய தேசியக் கட்சியின் அரசியல் அலுவலகத்தில் நடைபெற்ற கட்சியின் சட்டத்தரணிகள் கூட்டத்தில் உரையாற்றியபோதே ரணில் விக்ரமசிங்க இதனைத் தெரிவித்துள்ளார்.

2018ஆம் ஆண்டு ஹோமாகம நீதவான் நீதிமன்றத்தில் இடம்பெற்ற சம்பவத்தைத் தொடர்ந்து, நீதிமன்றத்தை அவமதித்த குற்றச்சாட்டில் ஞானசார தேரருக்குச் சிறைத்தண்டனை விதிக்கப்பட்டதாக அவர் குறிப்பிட்டுள்ளார்.

காவியுடையை அகற்றுவது தொடர்பில் மதத் தலைவர்கள் கவலை ஞானசார தேரர் சிறையில் இருந்தபோது, அவரது காவியுடையைத் தொடர்ந்து அணிய ஆரம்பத்தில் அனுமதி வழங்கப்பட்டதாக ரணில் விக்ரமசிங்க தெரிவித்துள்ளார்.

அப்போதைய நீதி அமைச்சர் தலதா அத்துகோரள வெளியிட்ட கடிதத்தில், ஞானசார தேரரின் காவியுடை அகற்றப்படாது என பௌத்த மதத் தலைவர்களுக்கு உறுதியளிக்கப்பட்டிருந்ததாகவும் அவர் குறிப்பிட்டுள்ளார்.