96தெலுங்கு ரீமேக்கில் பெரிய மாற்றம்!

வெற்றி பெற்ற படங்கள் மற்ற மொழிகளில் ரீமேக் செய்யப்படும்போது அந்தந்த மொழிக்கேற்ப திரைக்கதையில் சில மாற்றங்கள் செய்யப்படும். 96 படத்தின் தெலுங்கு ரீமேக்கில் பெரிய மாற்றம் ஒன்று செய்யப்பட்டுள்ளது.



விஜய் சேதுபதி, த்ரிஷா நடிப்பில் கடந்த ஆண்டு வெளியாகி ரசிகர்களிடையேயும் விமர்சகர்களிடையும் நல்ல வரவேற்பு பெற்ற படம் 96. இந்தப் படத்தின் தெலுங்கு ரீமேக்கில் த்ரிஷா கதாபாத்திரத்தில் சமந்தா நடிக்கிறார். விஜய் சேதுபதி நடித்த பாத்திரத்தில் ஷர்வானந்த் நடிக்கிறார். தெலுங்கு ரீமேக் உரிமையை தில் ராஜு பெற்றிருந்த நிலையில் 96 படத்தை இயக்கிய பிரேம் குமாரே தெலுங்கிலும் இந்தப் படத்தை இயக்கினார்.

96 படத்தின் சிறப்பம்சமாகச் சொல்லப்பட்டது அழகான காதல் கதையை ரசிக்கும்படியாக கூறியுள்ளதுடன் 90களை நினைவுபடுத்தும்விதமான காட்சிகள் அமைத்திருந்ததுதான். இருபத்திரண்டு வருடங்கள் பின்னோக்கி நகர்ந்து கதை பயணித்ததால் அதற்கேற்ப நடிகர்களைத் தேர்வு செய்தது படக்குழுவுக்கு பெரும் சவாலாக இருந்தது. விஜய் சேதுபதி, த்ரிஷா போன்ற தோற்றத்தை ஒத்த பதின்வயது ஜோடியைக் கண்டுபிடிப்பதற்காக மிகவும் பிரயத்தனப்பட்டது. எம்.எஸ்.பாஸ்கர் மகன் ஆதித்யா மற்றும் கௌரி கிஷன் ஆகியோர் அந்த வேடத்துக்கு மிகவும் பொருந்திப் போனதுடன் அற்புதமான நடிப்பை வெளிப்படுத்தியிருந்தனர். படத்தின் பெரும் பகுதியை இவர்கள் இருவரும் தாங்கிப் பிடித்தனர்.

ஆனால், தெலுங்கு பதிப்பில் இதற்கு வேலையே வைக்காமல் கதையின் ஃப்ளாஷ்பேக் 2009ஆம் ஆண்டுடன் நின்றுவிட உள்ளது. அதாவது பள்ளிக்காதலுக்குப் பதிலாக கல்லூரிக் காதலை அப்படம் கூறவுள்ளது. மேலும் ஷர்வானந்த், சமந்தா இருவரும் தங்கள் இளமைத் தோற்ற கதாபாத்திரங்களிலும் நடிக்கின்றனர். மார்ச் மாதம் இதன் படப்பிடிப்பைத் தொடங்கி ஆகஸ்ட் மாதம் வெளியிடத் திட்டமிட்டுள்ளனர். இது பற்றிய அதிகாரபூர்வ அறிவிப்பு விரைவில் வெளியாக உள்ளது.

தெலுங்கைப் போல கன்னட ரீமேக்கில் பெரிய அளவில் மாற்றங்கள் செய்யவில்லை. 96ஆம் ஆண்டிலிருந்து 99ஆம் ஆண்டுக்கு மட்டுமே மாற்றம் செய்துள்ளனர். கனேஷ், பாவனா அந்தப் படத்தில் ஜோடி சேர்ந்து நடிக்கின்றனர்.
#Tamilarul.net   #Tamil   #News   #Tamil News   #Tamil Daily News   #Website   #Tamil News Paper   #Tamil Nadu Newspaper  #Online   #Breaking   News Headlines    #Latest Tamil News   #India News    #World News   #Tamil Film   #Jaffna   #Kilinochchi  #Mannar  #Mullathivu  #Batticola  #Kandy  #Srilanka  #colombo