காலம்..!

நதியானதுன் வாழ்வு
அது வற்றுங் கிளைவிடும்
பரவும் பாயும் உறையும் என
நிறையும் நிகழ்வுகளால் வரையப்பட்டவன் நீ

ஒரு பட்டாம் பூச்சியாய்
மகிழ்வெறியும் நாட்களை நம்பாதே
அதன் சிறகும் ஓர் நாள் கலையும் பின் சனிக்கும்

ஒரு வானமாய் மகிழ்வெறியாதே
அதுவும் கறுக்கும் பின் வெளிக்கும்

ஒரு நட்சத்திரமாய் மகிழ்வெறியாதே
அதுவும் ஓர் நாள் விடியும் பின் விழும்

நிகழ்தகவின் சட்டையை அணிந்து
காலம் உன்னைச் சுமக்கிறது
நீர்க்குமிழியின் கண்களை அணிந்து
காலம் உன்னைப் பார்க்கிறது

குமிழிகள் உடைவதும்
குமிழிகள் பெருகுவதும்
குமிழிகள் கடலாவதும்
குமிழிகள் காணாமல் போதலும்
குமிழி மருங்கின் விசையினைப் பொறுத்தே

உனது விசையில் இசையும் காலம்
உன்னை எழுதிக்கொண்டேயிருக்கும்
நீ வரைவது வண்ணங்களாவதும்
வற்றிப் போவதும் எண்ணங்களின் கனதியைப் பொறுத்தே

நீ காற்றைச் சிறகாக்கி பற
காலத்தைக் கடலாக்கி நீந்து
உன்னைப் பொத்தகமாக்கிப் பாரு
காலத்தின் புன்னகையை உணர்வாய்
ஏனெனில் காலம் ஒரு அற்புத விளக்கு
பட்டாம் பூச்சிகளுக்கு மட்டும்.

த.செல்வா-
22.10.2019
முல்லைத்தீவு