இழுவைப்படுகு மீனவர்களை தாக்குவதென வடமராட்சி வடக்கு மீனவர்கள் தீர்மானம்!

 வடமராட்சிக் கடற்பரப்பில் அத்துமீறி மீன்பிடி நடவடிக்கையில் ஈடுபடும் இந்திய இழுவைப்படகு மீனவர்கள் மீது தாக்குதல் நடத்தப்படும் என்றும் எத்தனை உயிரிழப்பு நிகழ்ந்தாலும் பின்வாங்கப்போவதில்லை என்றும் வடமராட்சி வடக்கின் 13 மீனவச் சங்கங்கள் கூட்டாகத் தீர்மானித்துள்ளன.

இது குறித்த கலந்துரையாடல் இன்று (13) மதியம சக்கோட்டையில் நடைபெற்றது. சந்திப்பின் பின்னர் ஊடகங்களுக்கு வடமராட்சி வடக்கு மீனவ சங்கங்களின் சமாசத் தலைவர் நாகராசா வர்ணகுலசிங்கம் கருத்துத் தெரிவிக்கையில்,

“அண்மைக் காலமாக இந்திய இழுவைப்படகுகளின் அத்துமீறல் நடவடிக்கைகள் மிக அதிக அளவில் காணப்படுகின்றன. எமது மீன்வளம் முழுமையாக அபகரிக்கப்படுகின்றது. எமது மீனவர்கள் மீன்பிடி நடவடிக்கையை கைவிட்டு கூலிவேலைக்கு செல்ல வேண்டிய அபாய நிலைகூட காணப்படுகின்றது.

குறித்த அத்துமீறல் நடவடிக்கைகள் தொடர்பில் இந்திய, இலங்கையின் அனைத்துத் தரப்பினருக்கும் கடிதங்கள் மூலமும் நேரடியாகவும் கோரிக்கை விடுத்தோம். இருந்தபோதிலும் எந்த நடவடிக்கையும் எடுக்கப்படவில்லை.

எனவே இன்று ஒரு தீர்மானம் எடுக்கப்பட்டுள்ளது. இழுவைப்படகில் வருபவர்களைத் தாக்குவோம். அதன் போது ஏற்படும் மோதலில் எத்தனை உயிரிழப்புக்கள் நிகழ்ந்தாலும் அஞ்சப்போவதில்லை.

அவ்வாறு ஏற்படப்போகும் இழப்புக்களுக்கு இரண்டு நாட்டு அரசாங்கங்களும் தான் பொறுப்பேற்க வேண்டும். இன்று தொடக்கம் இழுவைப்படகுகளைக் கண்டால் உடனடியாகச் சென்று அடித்து தாழ்ப்போம் என்று தீர்மானிக்கப்பட்டதாக” குறிப்பிட்டார்.