அன்னதானக்கந்தன் செல்வச்சந்நிதியான் இன்றைய தினம் நள்ளிரவு கொடியேற்றம்.

 இலங்கை வடமாகாணம் யாழ்ப்பாணம் 

    "எந்நிதியும் தருவான் சந்நிதியான்"

அன்னதானக்கந்தன் செல்வச்சந்நிதியான் இன்றைய தினம் நள்ளிரவு கொடியேற்றம்.

12/08/2026.நள்ளிரவு. 12.15. மணிக்கு 

.

ஈழத்தின் வடபுலத்தில், உப்புக்காற்றும் கடலலையும் தழுவிச்செல்லும் தொண்டைமானாற்றின் கரையில், எந்தவித ஆடம்பரமுமின்றி அமைதியாக அமர்ந்திருக்கிறான் ஒரு முருகன்.

அவன் "செல்வச்சந்நிதி முருகன்". சமஸ்கிருத ஆகம விதிகளையோ, பிரம்மாண்டக் கோபுரங்களையோ விரும்பாத இந்த வேலவனுக்கு, தமிழ்நாட்டின் சோழப் பேரரசின் வரலாற்றுச் சுவடுகளுடனும், பண்டைத் தமிழரின் "விருந்தோம்பல்" பண்பாட்டுடனும் பிரிக்க முடியாத ஆழமான தொடர்புண்டு.

முதலாம் குலோத்துங்க சோழனின் தளபதியும், 'கலிங்கத்துப் பரணி' காவியத்தின் நாயகனுமான கருணாகரத் தொண்டைமான் உப்பு அள்ளுவதற்காகத் தோண்டிய கால்வாயே இன்று 'தொண்டைமானாறு' என்று அழைக்கப்படுகிறது.

சோழர் காலத் தமிழர்களின் கடல் வணிகமும், பொறியியல் திறனும் மிளிர்ந்த அந்த ஆற்றின் கழிமுகத்துவாரத்தில், இயற்கை எழில் கொஞ்சும் சூழலில்தான் இந்த வரலாற்றுச் சிறப்புமிக்க ஆலயம் உருவானது.

இக்கோவிலின் மிகப்பெரிய தனித்துவமே இதன் வழிபாட்டு முறைதான்.

இங்கு இறைவன் எந்தவொரு உருவச் சிலையாகவும் வீற்றிருக்கவில்லை; மாறாக, வேலாயுதம் பொறிக்கப்பட்ட ஒரு திரைச்சீலையின் பின்னணியிலேயே ஆத்மார்த்தமாக வழிபடப்படுகிறான்.

சங்க காலத்தில் தமிழர்கள் பின்பற்றிய "வேலன் வெறியாட்டு" மற்றும் "நடுகல் வழிபாட்டு" மரபின் தொடர்ச்சியை இங்கு நேரடியாகக் காணலாம். 

பிராமண ஆகமப் பூசாரிகளுக்குப் பதிலாக, 'சந்நிதியார்' எனப்படும் எளிய தமிழ் மரபுவழி அடியார்களே இங்கு பூசைகளைச் செய்கிறார்கள். 

சத்தமிடும் உரத்த மந்திரங்களுக்குப் பதிலாக, மௌனமும் தமிழ் வழிபாட்டு உணர்வுமே இங்கு முதன்மை பெறுகின்றன.

"வந்தாரை வாழவைக்கும் தமிழ் மண்" என்ற உயரிய பண்பாட்டிற்கு சான்றாக, இக்கோவில் "அன்னதானக் கந்தன் சந்நிதி" என்றே அழைக்கப்படுகிறது.

பசி என்று தன் வாசலுக்கு வரும் எந்தவொரு உயிரையும் வெறும் வயிறோடு திருப்பி அனுப்பாத அமுதசுரபியாக இத்தலம் விளங்குகிறது.

கடலும் ஆறும் சங்கமிக்கும் இடத்தில், பண்டைத் தமிழரின் வீரம், வணிகம், பக்தி மற்றும் விருந்தோம்பல் ஆகிய அனைத்தும் ஒன்றிணைந்து நிற்கும் செல்வச்சந்நிதி, வெறும் வழிபாட்டுத் தலம் மட்டுமல்ல; அது தமிழினத்தின் தொன்மையான ஆன்மீக முகவரியாகும்.

        சந்நிதியானுக்கு அரோகரா