சிம்பு - கவுதம்மேனன் - ஏ.ஆர்.ரஹ்மான் வெற்றி கூட்டணி

சிம்பு - கவுதம்மேனன் - ஏ.ஆர்.ரஹ்மான்  வெற்றி கூட்டணி மூன்றாவது முறையாக இணைந்து ஒரு படத்தை தர உள்ளது.

கவுதம் மேனன் இயக்கத்தில் சிம்பு, திரிஷா நடித்த `விண்ணைத்தாண்டி வருவாயா' படம் வெற்றி பெற்றது. அந்தப் படத்துக்கு ஏ.ஆர்.ரஹ்மான் இசை அமைத்திருந்தார்.  கவுதம் மேனன் - சிம்பு - ஏ.ஆர்.ரஹ்மான் கூட்டணி அச்சம் என்பது மடமையடா படத்திலும் இணைந்து வெற்றி பெற்றது. இந்த நிலையில் இந்த வெற்றி கூட்டணி மூன்றாவது முறையாக இணைவதாக சமீபத்தில் அறிவித்திருந்தார்கள்.

அந்த படம் `விண்ணைத்தாண்டி வருவாயா' படத்தின் இரண்டாம் பாகம் என்றும் கூறப்பட்டது. இந்தப்படத்தில் நடிக்க முதலில் மாதவனிடம் பேச்சுவார்த்தை நடத்தப்பட்ட நிலையில், முதல் பாகத்தில் நடித்த சிம்புவே நடிக்க இருப்பதாக அறிவிக்கப்பட்டது. இந்த படத்தில் சிம்புவுக்கு ஜோடியாக அனுஷ்கா நடிக்க இருப்பதாகவும் கூறப்படுகிறது.

சிம்பு தற்போது சுந்தர்.சி இயக்கத்தில் ரீமேக் படத்தில் நடித்து வருகிறார். அடுத்ததாக வெங்கட் பிரபு இயக்கத்தில் மாநாடு படத்தில் நடிக்க இருக்கிறார். இந்த இரு படங்களை முடித்த பிறகு கவுதம் மேனன் இயக்கத்தில் சிம்பு நடிப்பார் என்று எதிர்பார்க்கப்படுகிறது.