மஹிந்தவிடம் விடுக்கப்பட்டுள்ள முக்கிய கோரிக்கை!

ஊழல், மோசடியாளர்களுக்கு நாடாளுமன்றத் தேர்தலில் வேட்புமனுத் தாக்கல் செய்வதற்கு இடமளிக்க வேண்டாம்.

இவ்வாறு பிரதமர் மஹிந்த ராஜபக்சவிடம் 'மார்ச் 12 ' அமைப்பு நேரில் கோரிக்கை விடுத்துள்ளது.

இது தொடர்பில் அந்த அமைப்பு இன்று விடுத்துள்ள அறிக்கையில் மேலும் குறிப்பிடப்பட்டுள்ளதாவது,

“நாடாளுமன்றத் தேர்தலில் ஊழல், மோசடிகளற்ற நாடாளுமன்ற உறுப்பினர்களைத் தெரிவு செய்வதற்காகப் பொறுத்தமானவர்களுக்கு வேட்புமனுத் தாக்கல் செய்வதற்கு அனுமதி வழங்குமாறு 'மார்ச் 12 ' அமைப்பு அனைத்துக் கட்சித் தலைவர்களிடமும் கோரிக்கை விடுத்துள்ளது.

அதற்கமைய ஜனாதிபதி கோட்டாபய ராஜபக்ச, பிரதமர் மஹிந்த ராஜபக்ச உள்ளிட்ட ஏனைய கட்சித் தலைவர்களையும் நேரில் சந்தித்து இவ்விடயம் குறித்து தெளிவுபடுத்துவதற்கு 'மார்ச் 12' அமைப்பு எதிர்ப்பார்த்துள்ளது.

இவ்வாறு பிரதான அரசியல் தலைவர்கள் மற்றும் கட்சித் தலைவர்களைச் சந்திப்பதற்கு விடுக்கப்பட்ட கோரிக்கைக்கு அமைய இன்று கொழும்பு 7, விஜேராம மாவத்தையில் உள்ள பிரதமரின் உத்தியோகபூர்வ இல்லத்தில் 'மார்ச் 12' அமைப்பின் பிரதானிகள் பிரதமர் மஹிந்த ராஜபக்சவை சந்தித்துக் கலந்துரையாடினர்.

இதன்போது ஊழல், மோசடிக்காரர்களுக்கு வேட்புமனுத் தாக்கல் தாக்கல் செய்ய இடமளிக்க வேண்டாம் என்றும், தேர்தலில் போட்டியிட்டு தோல்வியடைந்த நபரொருவர் தேசியப் பட்டியல் கூடாக நாடாளுமன்றத்துக்குத் தெரிவுசெய்யப்படக் கூடாது என்றும், அதற்கான சட்ட திருத்தம் மேற்கொள்ளப்பட வேண்டும் என்றும் கோரிக்கை விடுக்கப்பட்டுள்ளது.

மேலும், வேட்பாளர் ஒருவர் செலவிடக்கூடிய பணத்துக்கான எல்லையை நாடாளுமன்றத்தில் தெரிவிக்குமாறும், வேட்பாளர்கள் ஒழுக்கமான தேர்தல் நடவடிக்கைகளில் ஈடுபட வேண்டும் என்றும் 'மார்ச் 12' அமைப்பின் அதிகாரிகள் இதன்போது பிரதமரிடம் தெரிவித்துள்ளனர்.

அத்தோடு எதிர்வரும் மார்ச் 12ஆம் திகதி நடத்துவதற்கு ஏற்பாடு செய்யப்பட்டுள்ள 'மார்ச் 12' அமைப்பின் மாநாட்டில் கலந்துகொள்ளுமாறும் பிரதமருக்கு அழைப்பு விடுக்கப்பட்டுள்ளது.

இந்தச் சந்திப்பில் 'மார்ச் 12 ' அமைப்பின் நிறைவேற்றுப் பணிப்பாளர் ரோஹன ஹெட்டியாராச்சி உள்ளிட்ட சிலர் கலந்துகொண்டனர்" - என்றுள்ளது.

#Tamilarul.net   #Tamil   #News   #Tamil News   #Tamil Daily News   #Website   #Tamil News Paper   #Tamil Nadu Newspaper  #Online   #Breaking   News Headlines    #Latest Tamil News   #India News    #World News   #Tamil Film   #Jaffna   #Kilinochchi  #Mannar  #Mullathivu  #Batticola  #Kandy  #Srilanka  #Colombo