யாழ் மாவட்ட செயலகமும் நல்லூர் பிரதேச செயலகமும் இணைந்து நடாத்திய நடமாடும் சேவை!

யாழ்ப்பாண மாவட்ட செயலகமும் நல்லூர் பிரதேச செயலகமும் இணைந்து நடாத்திய நடமாடும் சேவையானது இன்று (14.11.2025) காலை 8.30 மணிக்கு நல்லூர் பிரதேச செயலகத்தில், யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்களின் பங்களிப்புடன் ஆரம்பிக்கப்பட்டது.

இந்நிகழ்வில் நல்லூர் பிரதேச சபையின் உதவித் தவிசாளர் கௌரவ இ. ஜெயகரன், யாழ்ப்பாண மாவட்ட ஒருங்கிணைப்புக் குழுவின் இணைப்பாளரும் மாநகரசபை உறுப்பினருமான திரு. எஸ். கபிலன் உள்ளிட்ட பலரும் கலந்து கொண்டனர்.

அரசாங்க அதிபரின் உரை

நிகழ்வில் கலந்து கொண்டு கருத்து தெரிவித்த அரசாங்க அதிபர் அவர்கள், ஜனாதிபதி செயலகத்தின் நிதி அனுசரணையுடன் தேசிய ரீதியில் முன்னெடுக்கப்பட்டு வரும் நடமாடும் சேவையின் ஒரு பகுதியாக இச் சேவை நல்லூரில் நடைமுறைப்படுத்தப்பட்டதாகவும், இதன் முதன்மை நோக்கம் மக்களை ஒரே இடத்தில் ஒன்றிணைத்து பல்வேறு சேவைகளை ஒரே தளத்தில் வழங்குவதாகவும் தெரிவித்தார்.

அத்துடன், நல்லூர் பிரதேச செயலகம் சுற்றாடல் பாதுகாப்பு தொடர்பான சிறந்த செயற்பாடுகள் மற்றும் சிறந்த சமூக வலைத்தளம் விருதுகளை பெற்றமைக்கு பாராட்டுக்களை தெரிவித்த அவர், இந்நடமாடும் சேவையும் சுற்றுச்சூழல் பாதுகாப்பை கருத்தில் கொண்டு முன்னெடுக்கப்பட்டிருப்பதை குறிப்பிடத்தக்கதாகக் குறிப்பிட்டார்.

சேவை நாடிகள் பதிவு செயலி தொடர்பில்

சேவை நாடிகளின் விவரங்களை பதிவு செய்யும் செயலி அறிமுகப்படுத்தப்பட்டமை குறித்தும் அவர் பாராட்டுக்களைத் தெரிவித்துள்ளார். அரசாங்க அதிபர்களுடனான கடந்த கலந்துரையாடலில் முன்வைக்கப்பட்ட பரிந்துரைக்கு அமைவாக, இச் செயலி இலங்கையின் பிற மாவட்டங்களுக்கும் பகிரப்பட்டிருப்பதாகவும் தெரிவித்தார்.

இந்த செயலியைப் பயன்படுத்துவதன் மூலம்:

சேவை நாடிகளின் தேவைகளை துல்லியமாகப் பதிவுசெய்யலாம்,

அவர்களுக்கு தேவையான சேவைகள் குறித்து முழுமையான பரிசீலனை மேற்கொள்ளலாம் எனவும் அவர் கூறினார்.

அரசாங்க சேவைகளைப் பெற அதிகமான பொதுமக்கள் வருகை தந்தமை மகிழ்ச்சியளிப்பதோடு, இவ்வளவு மக்கள் சேவைகளுக்காக தேவைப்படுவது கவலையும் அளிப்பதாக அவர் குறிப்பிட்டார்.

மேலும், 2026 ஆம் ஆண்டின் முதல் நாளில் இருந்து அதிகாரிகள் சேவை நாடிகளிடம் நேரில்சென்று சேவைகளை வழங்கும் புதிய நடைமுறை அமல்படுத்தப்படும் என்றும் அவர் அறிவித்தார்.

வழங்கப்பட்ட சேவைகள்

இந்நடமாடும் சேவையின் போது கீழ்க்கண்ட பல்வேறு அரசுத் துறைகள் சேவைகள் வழங்கின:

தேசிய அடையாள அட்டை வழங்கல்

ஓய்வூதிய சேவைகள்

பிறப்பு, இறப்பு, உத்தேச வயது சான்றிதழ்கள்

மோட்டார் வாகன பதிவு மற்றும் வாகன வருமான அனுமதிப்பத்திர சேவைகள்

பிரதேச சபை சேவைகள்

பொலிஸ் திணைக்கள சேவைகள்

மனிதவள அபிவிருத்தி மற்றும் தொழில் வழிகாட்டல்

NVQ திறன் அபிவிருத்தி சேவைகள்

சமூக சேவைத் திணைக்கள சேவைகள்

முதியோர் தேசிய செயலக சேவைகள்

காணி தொடர்பான சேவைகள்

மருத்துவ முகாம் மற்றும் கண்புரை பரிசோதனை

கண்புரை பரிசோதனையில் தகுதியானவர்களுக்கு இலவச மூக்குக்கண்ணாடிகள் வழங்கப்பட்டன.

சமூக நலப் பொருட்கள் வழங்கல்

நிகழ்வை முன்னிட்டு பல நலப்பொருட்களும் பொதுமக்களுக்கு இலவசமாக வழங்கப்பட்டன:

சக்கர நாற்காலிகள்

செவிப்புலனற்றோருக்கான கருவிகள்

மூக்குக்கண்ணாடிகள்

மரக்கன்றுகள்

மாணவர்களுக்கு புத்தகப் பைகள்

தையல் இயந்திரம்

விளையாட்டு கழகங்களுக்கு விளையாட்டு உபகரணங்கள்

நீண்டகால படுக்கையில் உள்ளவர்களுக்கு படுக்கை

பொலித்தீன் பயன்பாட்டை குறைக்க முன்வைப்பாக துணி பைகள் மற்றும் இலைக் கஞ்சி பொதுமக்களிடம் பகிரப்பட்டன.

திருமணப் பதிவுகள்

இதுவரை திருமணப் பதிவு செய்யாமல் இணைந்து வாழ்ந்திருந்த ஐந்து தம்பதிகளின் திருமண பதிவுகள் இந்நிகழ்வில் சிறப்பாகப் பதிவு செய்யப்பட்டன.

நிகழ்வில் பங்கேற்றவர்கள்

மாவட்ட மேலதிக அரசாங்க அதிபர் திரு. கே. சிவகரன், நல்லூர் பிரதேச செயலாளர் திருமதி யசோதா உதயகுமார், உதவிப் பிரதேச செயலாளர் திரு. இ. சிவகரன், மாவட்டச் செயலக பிரதம கணக்காளர் திரு. எஸ். கிருபாகரன், உதவி மாவட்டச் செயலாளர் செல்வி உ. தர்சினி, பதவிநிலை உத்தியோகத்தர்கள், மாவட்ட மற்றும் பிரதேச செயலக உத்தியோகத்தர்கள், பொதுமக்கள் உள்ளிட்ட பெரும்பான்மையினர் கலந்து கொண்டனர்.